L Plan dl tlima dl Chemun se basa sun l “Klimaplan Südtirol 2040”, che à coche fin chël de arjonjer la neutralità tlimatica a livel provinziel nfina l 2040. L Ökoinstitut Südtirol ie unì nciarià cun l’elaburazion dl Plan dl Tlima de Urtijëi. L vën sustenì dal Energy-Team dl Chemun.
L ubietif de chësc plan ie chël de analisé la situazion atuela dl Chemun per ciche reverda l cunsum de energia y la energia renuvabla y de se anjenië ca strategicamënter ala mudazions dl tlima. Oradechël dëssa unides lauredes ora mesures cuncretes per la prutezion dl tlima y per l adatamënt ala mudazions dl tlima.
Do che l cunsëi cumenel dajerà pro l plan dl tlima, cialerà l Energy-Team che la mesures vënie metudes n droa.
Box de ideies digitela sun l Plan dl Tlima
Duc la zitadines y i zitadins dl chemun de Urtijëi possa mandé ite nchin ai 18.12.2025, pra chësc link, prupostes de mesures per la scunanza dl tlima y l'adatamënt ai mudamënc tlimatics, coche nce usservazions sun chël che ie unì laurà ora nchin śën: Box de ideies sun l Plan dl Tlima
Sëira de nfurmazion publica sun l Plan dl Tlima
20.11.2025 tla Cësa de Cultura
Ntan la sëira de nfurmazion publica iel unì spiegà ciche ie n Plan dl Tlima de n chemun y a ce pont che Urtijëi ie cun si plan tlimatich. Dlongia l nventar dla emiscions de basa y i resultac dla nrescida iel nce unì prejentà na prima verscion dl catalogh dla mesures cun la mesures ududes dant per la scunanza dl tlima. I partezipanc à abù l mesun de purté dant prupostes y usservazions n con' dla mesures prejentedes.
La prejentazion dl Ökoinstitut Südtirol cun l nventar dla emiscions de basa, i resultac dla nrescida y la mesures cun la prupostes di partezipanc possa unì desćiarieda tlo dessot:
Prejentazion ntan la sëira publica sun l Plan dl Tlima (per tudësch)
Sëuraprò à Christine Romen dl Energieforum purtà dant nfurmazions n con' dla suvenzions atueles tl setor dl'energia y dl sciaudamënt. Chësta ie la prejentazion (atenzion: atuel de nuvëmber 2025! Tl 2026 uniral bonamënter mudazions. Nfurmazions ajurnedes dl Energyforum ie da giapé sot a https://www.afb.bz/efs_de/infoblaetter/).
Suvenzions y detrazions fischeles (atuel de nuvëmber 2025) (per tudësch)
Nventar dla emiscions de basa dl Chemun de Ortisei
Na cumpunënta mpurtanta dl Plan dl Tlima ie l nventar dla emiscions de basa, che porta dant l cunsum energetich y la emiscions per l'ann de referimënt 2019. Sun la basa di cunsums y emiscions per l 2023 possen abiné ora i prim svilups y la prima tendënzes.
Nventar dla emiscions de Urtijëi (per tudësch)
Nrescida sun l plan dl tlima
01.05.2025 – 30.06.2025
Duta la zitadines y duc i zitadins de Urtijëi fova nviei a tò pert ala nrescida sun l plan dl tlima dl Chemun de Urtijëi per dì la sia sun la tematiches prutezion dl tlima y adatamënt ala mudazions dl tlima coche nce sun vel mesura cuncreta da mëter n droa. Ndut à tëut pert 128 persones.
Resultac dla nrescida per l plan dl tlima (per tudësch)
Workshop strategich per l’elaburazion di plan dl tlima
18.02.2025
L Chemun de Urtijëi ie de chëla che n arjonj la neutralità tlimatica me sce n tol ite bele dal scumenciamënt inant nce la grupes de nteresc ("Stakeholder") y la lies. Ai 18 de fauré iel perchël unit a s’l dé n workshop menà da Sonja Abrate y Anna Solderer dl Ökoinstitut. Danter i 19 che à tëut pert fovel cumëmbri dl Energy-Team y dl Cunsëi dl Chemun y reprejentanc di ciamps defrënc (danter l’auter dla lia per l turism, di mplanc portamont, l zënter de mubiltà de Gherdëina, dla cumenanza energetica Pontives, di paures y dla lies ambienteles).
Al scumenciamënt ti iel unì spiegà ai partezipanc ciche ie n plan dl tlima per n chemun y ciuni che ie si fins. Deberieda ti iel unì cialà ala analisa SWOT (ponc de forza, ponc dëibli, oportuniteis y periculi) dl chemun, laureda ora danora dal Chemun y l Ökoinstitut, y n à juntà vel pont che ie unì ora mpurtant. Daldò an spartì su la grupa te doi y i partezipanc se à dat ju cun la tematiches dla mubiltà, dl turism, dl artejanat, dl’energia, dl mudamënt dl tlima, dl lëur da paur y l lëur ti bòsc, dl’alimentazion, dl cunsum, dl refudam y dla comunicazion ti cialan al mudamënt dl tlima y al adatamënt ala mudazions dl tlima. Per la tematiches defrëntes iel unì laurà ora prupostes de mesures che l Ökoinstitut tulerà su tl plan dl tlima.
L protocol dl workshop cun la prupostes de mesures ie da abiné te chësc documënt (per tudësch):
Protocol dl workshop sun l plan dl tlima
Crì adum dati per l bilanz tlimatich atuel (nventer dla emiscions de basa) dl chemun
Fauré - juni 2025
L plan dl tlima cumenel vën laurà ora y cuntrolà aldò dla linies guida “Come sviluppare un piano d’azione per l’energia sostenibile e il clima (SECAP)” laurà ora dal Zënter de tueda dla Cumiscion Europea, acioche n possa cunfrunté l plan cun chël di autri chemuns.
L Chemun à ti ultimi mënsc, deberieda cun l Ökoinstitut, crì adum dati sun l cunsum de energia y de ciaut per dut l teritore cumenel per pudëi calculé l bilanz tlimatich atuel dl chemun. N ti cëla ai ani 2019, che vel coche ann de basa, y 2023 coche cunfront, per udëi l prim svilup ti ultimi ani. Tan de energia vëniel pa adurvà? Tan de strom, gas, penzin y diesel vëniel pa cunsumà? Ciuna pert dl cunsum de energia sons’a boni de curì cun energia renuvabla? Chëstes y autra dumandes sarà la basa per l “plan de azions”, l cuer dl plan dl tlima.
