L Chemun de Urtijëi à metù ju cursies per la rodes sun la stredes che porta ala scoles per aumenté la segurëza de chi che va cun la roda y per de purté inant la mubiltà sustenibla.
La cursies per la rodes ie unides metudes ju:
- Streda Purger-streda Sneton: danter la butëiga “Kasslatter” y la scola elementera, suvier.
- Streda Rezia: danter Plaza Sant’Antone y la scola mesana, te tramedoi direzions.
- Streda Mureda: danter la ncrujeda cun la streda Tavella y l “Col de Mureda”, suvier.
Sun la cursies per la roda possa duc i partezipanc dla streda furné, nce i auti. MA:
- Chi che va cun la roda à la prezedënza,
- Sce ies te auto: mët a verda a chi che va cun la roda y furnea plu bel plan, dantaldut dlongia la scoles.
- Schiva de bloché la cursia per la rodes o de lascé l auto lassù.
- Sce ies sun la roda: resta sun la cursia y mët a verda ai auti, ma lecordete che te es la prezedënza.
L se trata de n var de viers de na mubiltà plu sustenibla y respunsabla. Chësta mesura dëssa judé do che l vënie furnà de plu cun la roda, nce per jì a scola.
