Adurvé grunt publich Uniun possa fe dumanda sun papier da bol per adurvé grunt publich (grunt demanial). La dumanda muessun de jù tl ufize dla chëutes y n muessa njunté la documentazion tecnica y na marca da bol che vën metuda sun la autorisazion. Per i danesc che pudëssa uni a se l dé tres l adurvé grunt publich possa l chemun se dumandé n cauzion. N fej la defrënza danter ocupazion de grunt public permanënta (per plù de n ann) y ocupazion de grunt publich per ntant, canche la dura manco de un n ann. 5 dis dan che l’autorisazion toma possun dumandé de la slungë. Sce n fej nia chësta dumanda muessun deliberé l grunt publich canche la autorisazion toma. Sce n ne uel nia plù adurvé l grunt publich muessun ti l fé al savëi al chemun. Per ocupazions permanëntes paiun l 10% dla tarifa al di fata òra per la ocupazion per ntant. La tarifa per adurvé grunt publich ie smëndrida dl 80% per grunc adurvei per fins politics o istituzionei, per ativiteies y juesc tl ciamp dl spetacul da viandant y autri. Per adurvé sperses sota fonz o sëura l fonz vën mé calculà n chert dla tarifa. La tarifa per l’ocupazion per ntant che dura plù de 15 dis vën smëndrida dl 20% y per la ocupazion per ntant che dura plù de un n mëns mo n iede dl 50%. L ne ie da paië nia sce a adurvé grunt publich ie l stato, la regions, la provinzies, i chemuns y si consorzi, enc de chëla religions che ie lascedes prò dal stato, enc publics tl ciamp dla previdënza, dla educazion, dla cultura y n.i. Ënghe per chësta ocupazions ne paien nia: per ciarië y desciarië, per adurvé grunt tla curtines, ocupazions fates da lies tl ciamp religëus y soziel, lies scrites ite tl register ONLUS y autri.
La dumanda per adurvé grunt publich pudëis Ve tò jù dal pont formulares dl Ufize dla Entredes.
